കേരള സ്റ്റേറ്റ് ട്രാന്‍സ്‌പോര്‍ട്ട് പ്രോജക്ട് (കെ.എസ്.ടി.പി) നിര്‍മ്മാണ പ്രവൃത്തികള്‍ ഏറ്റെടുത്ത് നടത്തുന്ന തൃശ്ശൂര്‍ – കുറ്റിപ്പുറം റോഡിന്റെ നിര്‍മ്മാണ പ്രവര്‍ത്തികള്‍ ഫെബ്രുവരി ആദ്യവാരത്തില്‍ തന്നെ ആരംഭിക്കാന്‍ ജില്ലാ കളക്ടര്‍ അര്‍ജുന്‍ പാണ്ഡ്യന്റെ അധ്യക്ഷതിയില്‍ ചേര്‍ന്ന യോഗത്തില്‍ തീരുമാനമായി. തൃശ്ശൂര്‍ – കുറ്റിപ്പുറം റോഡിന്റെ നിര്‍മ്മാണ പ്രവൃത്തികള്‍ ഫെബ്രുവരി ആദ്യവാരത്തില്‍ ആരംഭിച്ച് മെയ് അവസാനവാരത്തില്‍ ഫസ്റ്റ്‌ലൈന്‍ ടാറിങും കോണ്‍ക്രീറ്റ് പ്രവൃത്തികളും പൂര്‍ത്തിയാക്കുന്ന രീതിയിലാണ് ആസൂത്രണം ചെയ്തിരിക്കുന്നത്.
തൃശ്ശൂര്‍ പാറമേക്കാവ് ജംഗഷന്‍ മുതല്‍ കല്ലുംപുറം വരെ 33.24 കി.മീ റോഡ് 4 ഘട്ടങ്ങളായി തിരിച്ച് പ്രവൃത്തികള്‍ ഒരുമിച്ചു മുന്നോട്ടുപോകുന്ന രീതിയിലാണ് നിര്‍മ്മാണ പ്രവര്‍ത്തികള്‍ നടക്കുന്നത്. 9 മാസമാണ് നിര്‍മ്മാണ പ്രവര്‍ത്തിയുടെ കാലാവധി. 2025 ഒക്ടോബര്‍ മാസത്തോടെ റോഡുകളുടെ എല്ലാ നിര്‍മ്മാണ പ്രവര്‍ത്തികളും പൂര്‍ത്തീകരിക്കുന്നരീതിയിലാണ് ആസൂത്രണം ചെയ്തിരിക്കുന്നത്. റോഡുപണി നടക്കുമ്പോള്‍ ആവശ്യമായ ഡൈവേര്‍ഷന്‍ ചര്‍ച്ച ചെയ്യുന്നതിനായി സബ്കമ്മിറ്റി യോഗം ചേര്‍ന്ന് തീരുമാനിക്കും.
കൊടുങ്ങല്ലൂര്‍ റോഡിന്റെ ഡൈവേഴ്‌സന്‍ പ്ലാന്‍ അനുസരിച്ച് പ്രവൃത്തി മുന്നോട്ടുപോകാനും യോഗം തീരുമാനിച്ചു. ഇറിഗേഷന്റെ കനാല്‍ ബണ്ട് റോഡ് പൂര്‍ത്തിയാകുന്ന മുറയ്ക്ക് പുത്തന്‍ റോഡ് വരെയുള്ള ഡൈവേഴ്‌സന്‍ കരുവന്നൂര്‍ പാലം വരെ നീട്ടാനും യോഗത്തില്‍ തീരുമാനമായി.
കളക്ട്രേറ്റ് എക്‌സിക്യുട്ടീവ് ഹാളില്‍ ചേര്‍ന്ന യോഗത്തില്‍ എംഎല്‍എ മുരളി പെരുനെല്ലി, തൃശ്ശൂര്‍ സിറ്റി പോലീസ് കമ്മീഷണര്‍ ആര്‍. ഇളങ്കോ, സബ് കളക്ടര്‍ അഖില്‍ വി. മോനോന്‍, കെഎസ്ടിപി എക്‌സിക്യുട്ടീവ് എഞ്ചിനീയര്‍ പി.വി ബിജി, കെ.എസ്.ടി.പി ഉദ്യോഗസ്ഥര്‍, വിവിധ വകുപ്പുതല ഉദ്യോഗസ്ഥര്‍, വിവിധ സംഘടനകളുടെ പ്രതിനിധികള്‍ തുടങ്ങിയവര്‍ പങ്കെടുത്തു
