വടക്കാഞ്ചേരി: ലോറി വൈദ്യുതിത്തൂണിലിടിച്ച് മറിഞ്ഞു. മുൻവശത്തെ ടയർ പൊട്ടിയതിനെത്തുടർന്നാണ് അപകടം. സംസ്ഥാനപാതയിൽ കരുതക്കാടിലാണ് വടക്കാഞ്ചേരി ഭാഗത്തുനിന്ന് കരിങ്കല്ല് കയറ്റി തൃശ്ശൂർ ഭാഗത്തേക്ക് വന്ന ലോറി അപകടത്തിൽപ്പെട്ടത്.ടയർ പൊട്ടിയ ശബ്‌ദം കേട്ട ആക്രിക്കട ജീവനക്കാർ കടയിലേക്ക് ഓടിക്കയറിയതിനാൽ ദുരന്തം ഒഴിവായി.
ആക്രിക്കടയുടെ മുന്നിലുള്ള വൈദ്യുതിത്തൂണിലാണ് വാഹനം ഇടിച്ചുനിന്നത്. ഡ്രൈവർ പരിക്കേൽക്കാതെ രക്ഷപ്പെട്ടു. വൈദ്യുതിത്തൂൺ തകർന്നതിനാൽ മേഖലയിലെ വൈദ്യുതിവിതരണം നിലച്ചു.