ആറ്റുകാൽ പൊങ്കാലക്കായി തിരുവനന്തപുരം നഗരം ഒരുങ്ങി കഴിഞ്ഞു. നിരവധി താരങ്ങളാണ് പൊങ്കാല മഹോത്സവത്തിൽ പങ്കെടുക്കാനെത്തുന്നത്.
ആറ്റുകാൽ പൊങ്കാലയോടനുബന്ധിച്ച് ആറ്റുകാലിൽ അന്നദാനം വിതരണം ചെയ്ത് കേന്ദ്രമന്ത്രി സുരേഷ് ഗോപി. ഭാര്യ രാധികയോടൊപ്പമാണ് കേന്ദ്രമന്ത്രി ക്ഷേത്രത്തിലെത്തിയത്. വരിയിൽ കാത്തുനിന്ന ഭക്തജനങ്ങൾക്ക് സുരേഷ് ഗോപി ഭക്ഷണം വിളമ്പി നൽകി. ഇന്നത്തെ അന്നദാനത്തിന്റെ ചെലവ് സുരേഷ് ഗോപിയാണ് വഹിക്കുന്നത്.
ഭാര്യയോടൊപ്പം ചോറ് വിളമ്പിക്കൊണ്ടാണ് അന്നദാനത്തിന് അദ്ദേഹം തുടക്കം കുറിച്ചത്. 15 മിനിറ്റോളം സുരേഷ് ഗോപി തന്നെയാണ് ഭക്തർക്ക് അന്നദാനം വിളമ്പിയത്. വരുന്ന ഭക്തരോട് കുശലം പറഞ്ഞും വിശേഷങ്ങൾ ചോദിച്ചുമൊക്കെ കേന്ദ്രമന്ത്രി അന്നദാനത്തിൽ സജീവമായി.
എല്ലാ വർഷവും ആറ്റുകാൽ പൊങ്കാലയുടെ തലേദിവസം ഇവിടെ വന്ന് അന്നദാനം നടത്താറുണ്ടെന്ന് രാധിക സുരേഷ് ഗോപി പ്രതികരിച്ചു. കഴിഞ്ഞ കുറച്ചുനാളുകളായി വീട്ടിലാണ് പൊങ്കാല ഇടുന്നത്. ഇത്തവണയും വീട്ടിലായിരിക്കും ഇടുന്നതെന്നും രാധിക പറഞ്ഞു. ഗായകൻ ജി വേണുഗോപാലും സുരേഷ് ഗോപിയോടൊപ്പം അന്നദാനം വിതരണം ചെയ്യാൻ പങ്കെടുത്തിരുന്നു.